قعدت امبارح قصاد التلفزيون اقلب بالريموت فى ملل من المحور ل فتافيت لدريم لهوووووب اوم لقيت ايه
ميلودى هيتس
جايبين ايه بقى
حفل مستر ايجيبت 2007
12 شاب مرصصين جمب بعضيهم و راسمين على شفايفهم ابتسامة البيبي فيس
و فيهم واحد قله كده و مربى شعره و عامله كيرلى ايو ا و النبى كيرلى
و الباقى طوال و عضلات بس شكلهم شنفات بردووو
المهم قلت اما اقعد اتفرج ع الانتيكة دوول
كان فى مذيعة عندها حوالى 20 حرف ضاربين من العربى بتاعها و المرفوع بتجره من شعوره و المجرور بتمسح بيه البلاط و مش عارفه تقول جملة مفيدة
المهم المذيعة قالت ديلوقتى معادنا مع التسفيات القبل نهائية و تبعا عاوزين نئول لكل اللى اشتركوا ان وصولهم للمرحلة دى انجاز مشرف
و بعد التصفيات فضل 5 موديلز
طلعت ماريا بعد كده غنت قصادهم و هما على وشهم ابتسامة انفشاخ مش البيبي فيس اللى قبل كده
و بعد كده اتسألوا كل واحد سؤال عشان نشوف شخصيته عامله ازاى
ف سألوا اول واحد قالوله " يا ترى لو بقيت مستر ايجيبت هتقدم ايه للسياحة فى مصر "
الواد القله ابو شعر كيرلى ده قال هعمل تعوية ايوا تعوية مش خطأ املائى هو قالها كده هعمل تعوية للشعب عشان الشعب مش حاسس باهمية السياحة
احتمال يكون هيخلى الشعب يعوى
و التانى سألوه مواقف فشل اتعلمت منها شيىء ايجابى
قالهم الفشل فى الدراسة
اصلى كان الوقت بيسرقنى و مبدخلش الامتحانات هى هى هى هى
المذيعة قالتله ثانك يوووو
و بعدين افتكرت انه لسه مجاوبش قالتله اه صحيح طب و اتعلمت ايه بقى من الفشل ده
قالها مضيعش وقتى تانى
ياختى نبيييييييييه الواد ده عبقرى
و كان فى واحد شبه المصارع ذا روك بتاع فيلم دوووم
سألته المذيعة يا ترى شايف ايه اشكال الظلم فى مجتمعنا
قالها عدم المساواة بين الرجل و المرأة و الفقر و التمييز الطبقى
بذل مجهود فى الحفظ شكله الوحيد اللى قال جملة مفيدة اشك فى انه عارف معناها
و سألوا الرابع اذكر حدثين من اهم الاحداث الايجابية و السلبية فى ال 100 سنة الاخيرة
قال امممممم هه اه الحرب العالمية التانية من اهم الاحداث السلبيه
المذيعة شكرته و سكت على باقى السؤال اللى هو حدث ايجابى كمان
يمكن مش لاقى احداث ايجابيه هيقطع نفسه يعنى
و الاخير قالوله يا ترى ايه اهم سمة تميز مستر ايجيبت 2007 فى رايك
ابتسم ابتسامة عرضة و قال التمووووووووووح التموووح تبعا لازم يكون عند اى موديلز فى اى وقت عشان يعرف يحقق اهدافه
بيقول كلام متين الشاب ده
المهم
حانت ساعة الصفر و جاء وقت اعلان النتيجة اللى هيكون فيها مستر ايجيبت يعنى ملك جمال مصر و اربعة وصفاء زى و صيفات ملكة جمال مصر كده
الاربعة دول بيساعدوه فى المهام بتاعتووووووو
طلع ملك جمال مصر مين يا ولاد
الواد ابو شعر كيرلى
و الوصيف الاول بتاعه مين .. الفاشل دراسيا
هو ده اللى فى اى وقت مستر ايجيبت يتخلى عن منصبه هيبقى الفاشل ده هو مستر ايجيبت يعنى مثال لاحسن شاب فيكي يا مصر
و انتهى الحفل و انا قاعدة منشهلة معرفش منشهلة ازاى يعنى بس كنت حاسه انى هتشل و فنفس الوقت مذبهلة فطلعت حالة من الانشهلال
اخر مشهد كمان ماسوووووووورة بنات و انفجرت فوش الواد ابو شعر كيرلى طلعوا ع المسرح يهنوه و امووواه امواه امواااه و هو عمال يجيب شعره ب ايده على جمب نوبه يمين و نوبه شمال
ليه ميتعملش مسابقة الشاب المسلم المثالى
ليه لما بنقلد عشان نواكب العصر بنقلد تقليد اعمى واعور و اضبش تقليد يقرف و يخلى الواحد معدته تقلب
